پنجشنبه - ۷ - عقرب - ۱۴۰۵
کشته‌شدن ۱۰ قاچاق‌بر مواد مخدر در درگیری با مرزبانان تاجیکستان
منابع محلی می‌گویند که در پی درگیری مسلحانه میان گروهی از قاچاق‌بران مواد مخدر و مرزبانان تاجیکستان، ۱۰ تن از قاچاق‌بران کشته شده‌اند.
بر اساس اطلاعات منابع، این درگیری شامگاه سه‌شنبه، ۵ عقرب، در مناطق سرچشمه و قواق، در نزدیکی مرز تاجیکستان، رخ داده است.
به گفته این منابع، قاچاق‌بران هنگام انتقال مواد مخدر و عبور غیرقانونی از مرز، در منطقه سرچشمه، در ولسوالی شمس‌الدین شاهین تاجیکستان، با مرزبانان این کشور روبه‌رو شدند که در پی آن درگیری مسلحانه میان دو طرف آغاز شد.
منابع افزوده‌اند که قاچاق‌بران باشنده‌گان ولسوالی چاه‌آب ولایت تخار بودند و پس از این رویداد، اجساد کشته‌شدگان به افغانستان انتقال داده شده است.
همچنین، این منابع مدعی‌اند که افراد کشته‌شده با شبکه قاچاق مواد مخدر مرتبط بوده‌اند که با «حاجی بشر نورزی» ارتباط دارد و «حاجی غلام حیدر لنگ» آن را مدیریت می‌کند.
این ادعا به‌گونه مستقل تأیید نشده است و طالبان تاکنون در این مورد اظهار نظری نکرده‌اند.
